-इलाम सूत्र समाचार-
इलाम/लोकतान्त्रिक जनआन्दोलनको १३ औं दिन आज बैशाख ५ गते मंगलबार इलाम सदरमुकामका सडक महिलाको जनप्रदर्शनले खचाखच भरिएको थियो । निरङ्कुश राजतन्त्रको बिरोधमा हजारौं महिलाले चर्का नाराबाजी गर्दै लोकतन्त्रको पक्षमा आयोजित जुलुस र सभामा सहभागी भई आफूलाई कट्टर लोकतन्त्रवादी भएको प्रमाणित गरेका छन् । सदरमुकामको रत्नचौकबाट शुरु भएको जुलुश इलाम नगरका विभिन्न भाग परिक्रमा गर्दै गणतन्त्र चौकमा आइपुगेर सभामा परिणत हुँदा महिलाले लोकतान्त्रिक गणतन्त्रका पक्षमा खुलेर नारा लगाए ।
घरमा गरिने सधैंका काम छोडेर आफ्नो अधिकार रक्षाका निम्ति लोकतन्त्र एक मात्र विकल्प भएको भन्दै सडकमा उत्रिएका महिलाले सभामा गीत, कविता, पनि बाचन गरे । विद्यालय, क्याम्पस पढ्नेदेखि घरका चुलाचौकामा व्यस्त हुने महिलासमेत आजको जुलुसमा सहभागी भए । सभामा पुरुष आन्दोलनकारीको पनि बाक्लो उपस्थिति थियो । इलाममा भएका जनप्रदर्शनमध्ये आजको उपस्थिति उल्लेख्य रहेको भन्दै आन्दोलनरत पक्षले आगामी दिनमा पनि महिलालाई सडकमा आउन आग्रह गरेका छन् ।
गैसस महासंघको अन्तर्क्रिया
जारी लोकतान्त्रिक आन्दोलनलाई निर्णायक मोडमा पुर्याउन आम हड्ताललाई अझ कडा बनाउनुपर्ने धारणा गैससकर्मीहरुले राखेका छन् । गैर सरकारी संस्था महासंघको आयोजनामा इलाममा आज मंगलबार आयोजित अन्तर्क्रियाका वक्ताहरुले जनआन्दोलनले गति लिइरहेको बेला हड्ताल खोल्नुपर्ने माग राख्ने तत्वले आन्दोलन निस्तेज पार्ने नियत लिएको बताएका थिए ।
सडक साक्षात्कार र हलगोरुसहित जुलुस
लोकतन्त्रको पक्षमा फिक्कलस्थित शान्ति र विकासका लागि सञ्चार मञ्चले आजै फिक्कल चोकमा सडक साक्षात्कार सम्पन्न गर्यो । मञ्चका कार्यवाहक अध्यक्ष तोयानाथ भट्टराईका अनुसार साक्षात्कारका वक्ताहरुले लोकतन्त्रका पक्षमा आन्दोलनका लागि सडकमा उत्रिन सम्पूर्ण पक्षलाई आग्रह गरेका थिए । फिक्कलबासीले आजै फिक्कल बजारमा हलगोरुसहितको किसान संलग्न रहेको जुलुस पनि प्रदर्शन गरेका थिए ।
इलामको उत्तरी पुवामझुवा गाविसमा पनि लोकतान्त्रिक जनआन्दोलनका पक्षमा राजसंस्था बिरुद्वका चर्का नारासहित दिनहु“ जुलुस, मसाल प्रदर्शन र कोणसभाहरु हुने गरेका छ ।
लोकतान्त्रिक क्षेत्र घोषणा
लोकतान्त्रिक आन्दोलनको पक्षमा बरबोटेको धारापानीमा पनि आजै बिहान प्रदर्शन गरिएको छ । नवप्रतिभा यूवा समूहको अगुवाईमा सम्पन्न जुलुस र कोण सभामा पाँचसय बढीको उपस्थिति रहेको स्थानीय केदार ढुङ्गानाले बताएका छन् । जुलुसले ठाउँ ठाउँमा निरङ्कुशताको पुतला दहन गरेको थियो । सोही सभामा धारापानी क्षेत्रलाई ‘लोकतान्त्रिक क्षेत्र’ घोषणा गरेको छ ।
घोडा सहित किसानको जुलुस
लोकतान्त्रिक आन्दोलनमा ऐक्यबद्धता जनाउँदै घोडा व्यवसायीहरुले पनि आज इलाम बजारमा घोडासहित पर््रदर्शन गरेका छन् । दर्जनौं घोडा लिएर प्रदर्शनमा आएका बरबोटे र सुम्बेक गाविसका घोडा व्यवसायीहरुले बरबोटेको बिब्ल्याँटेदेखि इलामबजारसम्म प्रदर्शन गरेका थिए । लोकतन्त्रका पक्षमा राजतन्त्र बिरोधी नारा लगाउँदै सदरमुकाम आई पुगेको घोडा जुलुशलाई इलाममा प्रदर्शन गरिरहेका आन्दोलनकारीले ताली बजाएर स्वागत गरेका थिए । व्यवसायिक लोकतन्त्र स्थापनाका लागि सबै व्यावसायीले आ-आफ्नो साधन सहित सडकमा आउनुपर्नेमा उनीहरुले जोड दिएका छन् ।